日本風格之王：Kato-San

認住呢部驟眼睇會令香港人以為係某檸檬茶贊助嘅McLaren 650S，又或者同樣「檸味十足」嘅Mazda RX-3，佢哋嘅主人就係被Mad Mike稱為「日本風格之王」嘅Kato-San。Kato-San擁有自己嘅改裝車店「Liberty Walk」，專門改裝各類高級跑車，而佢兩部愛車就分別代表咗佢嘅個人喜好——最新超跑？佢喜歡；經典舊車？佢更喜歡。事關佢後生啱啱拎牌，冇咩錢嘅時候就係同朋友玩舊車，初戀總係比較刻骨銘心嘛。

喺片段中Kato-San指自己鍾意開展、而唔係跟隨潮流，但同時佢亦坦承其實唔係特登要建設所謂「自己嘅風格」，佢五十年黎嘅目的其實都只係想街上有更多人認得出佢嘅作品。Mad Mike指Kato-San不在意要滿足所有人，佢只係想自己開心，如果有人欣賞固然係好事，但就算冇佢亦都自得其樂。

美國風格「跳跳車」：Cholo's Custom

起源自四、五十年代墨西哥、由美國Hip Hop發揚光大嘅「Lowrider」於日本改裝車文化中亦估一席位，而Cholo's Custom就係其中一間「Lowrider」改裝車店。店主Hisashi Ushida本身對Lowrider冇咩興趣，但後來受朋友影響先開始踏足Lowrider嘅領域。每逢週末佢就會同一班志同道合嘅朋友一齊聚會，當然亦會將佢哋精心保養嘅靚車揸出街。

你以為佢揸出街係為咗吸引眼球？Ushida就話呢啲嘢係佢後生嗰時先會做，依家對佢黎講最重要嘅就係好玩，其他人在唔在意，佢就唔多在意啦。

暴走K-Truck

你去旅行可能會留意到日本係冇「貨Van」，取而代之嘅係比起Pickup Truck更細架、更適合狹窄街道、而且引擎極小(約600cc)嘅「K-Truck」。而呢類「開工車」喺日本一樣有一玩改裝。本身係「暴走族」嘅Oda-San，後生時嘅改裝風格基本上就係「違法」，但佢自稱近年隨住年齡增長，就比較喜歡「睇落誇張，但依然合法」嘅風格。

K-Truck——或者大部份日本改裝車——都對「外觀」外常注重，Oda-San指日本人鍾意一切有趣嘅嘢，而「打扮」正正就係「有趣嘅嘢」，所以日本嘅改裝文化先會如此多姿多彩。

LED狂牛

喺香港，你揸架林寶出街已經足已令全條街嘅人望住你，但喺日本就有好一班人認為原裝林寶「好悶」，其中一位就係Morohoshi(諸星)先生。諸星先生嘅LED林寶出名到連遊戲《Need for Speed》入面都有架「Morohoshi's Lamborghini Diablo SV(1999)」，最大嘅特色當然就係浮誇嘅噴色、貼有鑽石嘅車身以及佈滿全車嘅LED燈條。

諸星先生話一開始喺自己嘅林寶上裝LED燈，係因為佢覺得原裝林寶好悶，於是佢就開始因應自己嘅喜好、風格去改裝。佢由日本另一改裝車文化「Dekotora(暴走貨車)」以及《Star Wars》中得到靈感，最後就成為大家眼前嘅LED林寶。諸星先生亦坦承自己嘅作品睇落去會有啲似「不法之人」，但佢咁多年黎都係憑自己嘅喜好做事，其他人諗咩佢唔太Care。

日本獨有：暴走貨車

亦即上文提到嘅「Dekotora, デコトラ」。Dekotora係日文嘅簡稱，全寫其實係「Decoration Truck」，亦即係裝飾貨車。Dekotora嘅主要著眼就係要搶眼，所以幾乎全車都佈滿LED燈，整個車頭都鉅細靡遺地充斥住不同裝飾品，乃係日本獨有嘅改裝車文化。

片中訪問嘅林(Hayashi)先生指自己係受到日本70年代電影系列《貨車野郎(トラック野郎)》影響而沉於Dekotora，甚至喺佢有車牌之前就已經將自己嘅單車改裝成同樣風格。當中目的當然係為咗突出自己，但同時呢個興趣亦令佢認識好多朋友，每次打開LED燈就自然會有人群聚集於佢車前，呢樣就係最大嘅樂趣。

暴走族本人登場

「暴走族」本身就係指非法改裝車輛嘅人，其他嘅日本改裝文化，其實或多或少都有暴走族嘅影子存在。根據片中日本電音組合「Rude Playerz」成員Souki所講，暴走族一開始其實係一班想賽車，但又冇咩錢嘅人。由於冇辦法負擔一架真正嘅賽車，或者真係去賽道跑一轉，於是就唯有改裝街車，喺公路上奔馳。

由於標奇立異，加上噪音、危險駕駛等問題，暴走族一直被日本社會認為係壞事，但Souki就指暴走族同美國嘅Lowrider大同少異，其實只係風格、形象嘅表現。佢將創作音樂同改裝車輛相提並論，認為兩者其實都係為自己、為世界嘅一種創作。

聚首一堂：大黑收費站休息處

位於橫濱首都高速灣岸線之下，大黑休息站就係關東改裝車迷每逢週末嘅聖地。喺呢到你可以見到以上所講嘅所有改裝車「門派」，甚至有更多擁有各自特色嘅改裝車。大家聚集唔係為咗競爭，只係為咗交流。Mad Mike話呢個現象代表咗汽車改裝基本上係完全自由，你可以隨心去決定點樣去改裝自己部車，亦唔需要迎合其他人嘅喜好。就正如上面多位受訪者一再強調，最緊要係好玩，其他嘢仲需要理會咩？